Mikkäs vaikuttavat meän psyykkisheen terhveytheen?

Läjä faktoria vaikuttavat meän psyykkisheen terhveytheen. Paljon on kyse siittä mitä tehemä, kunka elämä ja mitä koema. Faktorit voivat olla yhtheiskuntatasola, meän likheisten ympäristössä ja yksityisä asioita. Psyykkinen terhveys muuttuu kans elämän aikana. Kaikhiin usseimat kokevat psyykkisiä vaivoja eri elämän tilantheissa. Vaivat saattavat olla sekä lyhy- ette pitkäaikaisia ja eri tason vaikeuksia. Joskus met tarttema apua ette voija paremin.

Tietyt asiat jokka vaikuttavat psyykkisheen terhveytheen on vaikeampi muuttaa, niinku fyysisiä eli biulookisia faktoria eli meän kasvatusta. Muita on helpompi vaikuttaa itte, niinku elämäntyyliä ja tapoja.  

Meitä vaikuttavat muun muassa:

• biulookiset faktorit niinku geneettinen perintö, ikä ja sukupuoli
• elämäntavat ja ylheinen terhveystilane
• psyykkiset faktorit kun neuropsykiaatriset toimintaestheet, personalisuus, kognitiivinen kyky ja psyykkisten rasituksitten vastustusvoima
• sosiaaliset faktorit kun kasvatusehot, suhtheet, normit, kulttuuri, asuntotilane, ekonoomiset eelytykset, työ ja koulutus.

Suoja- ja riskifaktorit

Faktorit jokka vaikuttavat psyykkisheen terhveytheen kuttuthaan useasti suoja- ja riskifaktoriksi.

Suojafaktorit saattavat esimerkiksi olla ette on hyvä itten luottamus eli likheinen kaveri, hyvä työmiljöö eli harrastus josta toela tykkää. Tärkeä on kans syä terhveelistä ruokaa, liikkua säänölisesti ja saa tarpheeksi unta.

Riskifaktorit on suojafaktoritten vastakohat. Riskifaktorit saattavat olla ette kasuta ylös perheessä jossa on riippuvuusongelmia, paljon konfliktiä, ekonoomisia vaikeuksia eli tuntea ette sitä ei sovi. Näilä saattaa olla nekatiivi vaikutus terhveytheen.
Hyvä on ette suojafaktorit saattavat lieventää riskifaktoritten vaikutuksia, lisätä sinun psyykkisen saihrauven vastustusvoimaa ja luopi
ette olet paremin varustunu kohtaahmaan elämän haastheita.