Keinoja kuinka voipi paremin

On olemassa paljon mikkä vaikuttavat sinun psyykkisheen vointhiin. Vissiä asioita sie saatat ohjata itte, mutta muile on hankalampi tehhä mithään. Tässä alla mainithaan joitaki keinoja mitä sie itte saatat tehhä jokka vahvistavat sinun psyykkistä terhveyttä ja saapi sinun voihmaan paremin. Ajattele ette se saattaa vaatia aikaa ette lua uusia tapoja. Sie et tartte tehhä kaikkia kerrala. Alota jollaki joka soppii sulle justhiins nyt.

Vissiä asioita jokka vaikuttavat siihen kunka sie jaksat on vaikeampi muuttaa itte. Jos sie voit kauhean huonosti eli jos on olosuhtheita, jokka tekevät ette sulla on vaikea muuttaa sinun tilanetta eli kunka sie jaksat. Sillon sie saatat tarttea tukea ja apua ette päästä paremale tasole, esimerkiksi hoijon avula.

12 keinoa jokka saattavat vahvistaa sinun psyykkistä terhveyttä  

Puhu jonku kans siittä kunka sie jaksat

Antamalla sanoja tuntheile saattaa auttaa sinua käsithään itteästi
ja saahmaan tukea kun sie tarttet. Kun saapi puhua jonku kans johonka
sie luotat ja selittää miltä sulle tuntuu saattaa helpottaa kanthaan raskhaita ajatuksia ja tuntheita. Yritä puhua jonku kans kuinka sie jaksat ja tunnet, vaikka se saattaa tuntua hankalalta. Justhiins niinku monen muun kans se helpottaa kun harjottelee.  

Ole yhessä ihmisitten kans jokka saavat sinun voihmaan hyvin

Tuntea turvaa ja pystyä olheen oma ittensä yhessä muitten kans on tärkeä pohja tuntea psyykkisesti hyvältä. Terhveeliset sosiaaliset suhtheet antavat sulle tarmoa ja tukea kun sie sitä tarttet.

Liiku säänölisesti

Säänölinen fyysinen harjottelu on monela laila hyvä mielen terhveyvele. Se saattaa antaa sulle pareman unen, pareman keskeytyskyvyn ja voipi helpottaa kiusaa ja tuskaa. Kaikki liikkuminen räknäthään ja vähänen fyysinen aktiviteetti on parempi kun ei yhthään. Pienetki muutokset saattavat antaa hyvviä vaikutuksia aika kätevästi.

Priuriteeraa nukkumista ja toipumista

Tarpheelinen uni lissää vastustusvoimaa sekä fyysisiä ette psyykkisiä rasituksia vasten. Nuoret pruukaavat tarvita suunile kaheksan - kymmenen tiimaa unta vyössä ja raahvaat suunile kuus - yheksän tiimaa. Jos sie tunnet ette olet virkku ja hyvintoimiva päivänaikana sie uskottavasti saat kylliksi unta. Unen aikana aivot ja kroppa saavat aikaa toipua ja käyä läpi vaikutelmia.

Kehitä itteä ja sinun ittetuntoa

Ittetunto on ette tuntea olevansa tyytyväinen ittensä kans ja tuntea olla arvokas. Ensi askel kehithään ja vahvisthaan ittetuntota on ette lisätä tietoisuutta mitä sie ajattelet ja tunnet ittestä. Sie saatat vahvistaa sinun ittetuntoa erilä tavoila, esimerkiksi kokemalla uusia asioita. Haastaa nekatiivisiä ajatuksia ja tuntheita joita sulla on ittestä, harjotella sanhoon sinun mielipitheitä. Eli löythään yhtheyttä jossa sie tunnet ittesti arvokhaaksi ja arvostetuksi. Tämä sitten saattaa vahvistaa sinun psyykkistä terhveyttä.

Ole siivo itteä kohti

Olla ystävälinen ja käsittäväinen itteä kohti merkittee ette on myötätuntoa ittensä kans, jota kans saattaa pittää vastakohtana omakritiikhiin. Yritä vaatia kohtuulisesti ja pittää kohtuulisia ototuksia ittestä. Se on hyvä muistuttaa itteä etteei kukhaan ole täyelinen. Harjottele kuuntelheen sinua itteä ja sinun tarpheita ja kohtele itteä niinku sie kohtelisit läheistä kaveria.

Anna omasta aijasta ja sinun kiinostuksesta

Auttaa toisia ja osalistua intohimosesti kysymykshiin saattaa antaa tuntheen yhtheisyyestä ja merkityksestä niin ittele kun muile. Tunne ette saattaa vaikuttaa voipi vahvistaa meän hyvinvointia. On olemassa monta tappaa näyttää osalistumista, esimerkiksi näyttämällä innostusta, huolta ja huomioittea henkilöitä jokka on sinun läheisiä, eli kysyä jos joku tarttee apua. Se saattaa kans olla ette tehhä volontäärityötä eli osalistua kysymykshiin joihin sie olet suuresti innostunu.

Luo tapoja jokka saavat sinua voihmaan hyvin

Rytinit meän perustarpheile niinku ruoka, uni, fyysinen aktiviteetti, toipuminen ja sosiaaliset suhtheet on tarpheelisia luomhaan terhveyven eelytyksiä. Löytää tasapainon työn, koulun, vapa-aijan ja muitten arkipäivähommitten välissä saattaa auttaa sinua voihmaan hyvin arkipäivässä. Tavat saattavat joskus tuntua itesthään selvät ja ikävät, mutta net kärsivät useasti jos sitä voipi huonosti. Ja silloin tavaliset arkipäivän tavat saattavat olla erittäin tärkeitä.  

Stressaa sopivan paljon

Se ei ole haitalista ette joskus on stressattu. Mutta ette kokea paljon pitkän aijan stressiä saattaa vaikuttaa nekatiivisti sinun terhveytheen. Sen takia on tärkeä käsittää ja jos mennee yrittää tehhä jotaki semmoselle mikä aiheuttaa stressiä, pittää sopivia ototuksia itteä kohti ja löytää aikaa unele, fyysiselle harjottelule ja toipumiselle. Se antaa maholisuuen”laajata batteria” ja jaksaa pitemphään. Sitä tarttee piiain hakea ammattilaista apua, jos stressi tullee liian suureksi eli kestää liian pitkhään.

Kehitä kestäviä sjärmitapoja

Tietokonheen, TV:n, mubiilin ja syrffilauvan käyttö on tärkeä osa monen arkipäivästä. Joskus sjärmiaika ottaa liian suuren osan vapa-aijasta ja kilpailee muitten tärkeitten asioitten kans, kun uni, fyysinen aktiviteetti
ja sosiaalisiaa suhtheita. Digitaali meetiat voivat kans vaikuttaa sinun vointhiin. Sen takia saattaa olla hyvä miettiä sinun sjärmitapoja, sekä aikaa ette niitten sisältöä. Se saattaa auttaa sinua panheen aikaa sellaishiin, jokka saavat sinua voihmaan hyvin.

Käytä vapa-aikaa hyvin

Merkitykselinen vapa-aika saattaa vahvistaa sinun psyykkistä terhveyttä. Sen takia se on hyvä jos yrität käyttää aikaa semmosheen, jonka kans sie viihtyt ja tykkäät on mielekästä ja kehittävää. Se saattaa olla vaikkapa kulttuuri aktiviteettiä, trääninkiä, olla luonossa ja ulkoelämää, ruanlaittoa, kartanonhoitoa eli muuta. Ei ole olemassa lakia mikä määrää jos joku on oikea eli väärä, mitä koskee viehättävää vapa-aikaa. Ota lähtökohtaks sinusta ittestä ja innostuksista, mistä sie tykkäät ja mitä tarttet.

Yritä hyväksyä ette elämä kulkee ylös ja alas

Usseimila on perjuutia elämässä kun tunnema ette olema alakuloset, levottomat, vihaset eli stressatut. Net tuntheet menevät usseimiten yli.
On useasti avuksi jos leppäät ajatuksessa ette hyväksyä raskhaita tuntheita . Se tekkee ette saatama löytää jonkinlaisen rauhan emmäkä tartte jahata ratkaisuja. Hyväksyminen ei tarkota ylösantamista, vaan ette hyväksyä tilantheen niinku se on – justhiins nyt. On kans tärkeä yrittää saa lepoaikaa töisevistä tuntheista, esimerkiksi ette tehet semmosta mistä tykkäät. Mutta jos net töisevät perjuutit tulevat pitkiksi ja vaikuttavat sinhuun paljon arkipäivässä. Sillon sie saatat tarvita hakea apua.