Jos sie voit huonosti

Kaikin voivat joskus huonosti. Se on luonolinen osa elämästä. Usseimiten se tunne mennee yli, mutta joskus sie saatat tarttea tukea eli apua ette voija paremin. Tässä saatat lukea mitä sie itte saatat tehhä ja mihinkä saatat kääntyä kun tarttet apua.

Ung kvinna ligger på rygg i en säng med mobilen bredvid

Jos se on hätätilane

Voitko kauhean huonosti ja ajattelet ette elämä ei ole elämisen arvonen? Onkos sulla ittemurhaan hunteerinkiä eli suunitteluja? Sillon et piä pittää sitä omana tietona. Sie tarttet puhua jonku kans kenheen sie luotat, hakea hoitoa eli ottaa yhtheyttä tukisjuurin kans. Ittemurha-ajatukset on aika tavalisia ja siihen on olemassa hyvvää apua.

Soita varsin 112 eli ota yhteyttä psykiaatrisen vasthaanothoon jos sie voit kauhean huonosti eli mietit tehhä ittemurhaa.

Se on okei ette voija huonosti joskus

Kaikila on huonoja päiviä. Usseimiten se ei ole mithään jostako sitä tarttee hakea apua, joskus elämä on kertakaikkia vähän liikä ankara. Ko se on sillä laila niin
se saattaa riittää perheen ja kaveritten avula ja ette puhua kunka sitä jaksaa, nukkua oorninkhiin, syä hyvin ja liikkua.

Jos net huonot päivät kuitenki on useamat ko net hyvät, ja sie et tunne itteä ittenä eli et pysty hoithaan töitä, koulua eli kohata kaveria niin se on tärkeätä puhua jonku kans ja piiain hakea apua. Aluksi se saattaa olla joku perheessä, kaveri eli joku muu johonka sie luotat. Jos sie tarttet lissää tukea sie saatat ottaa yhtheyttä sinun terhveyskeskuksen kans. Niitä on kans organisasuunia jokka on töissä psyykkisen terhveyen kans jokka tarjoavat tukea telefoonin, tjatin eli meilin kautta.

Jos sie voit kauhean huonosti

Se on tärkeätä ette sie otat yhtheyttä sinun terhveyskeskuksen eli psykiaatrisen aukihoitovasthaanoton kans ko sie voit kauhean huonosti eli jos sulla on hunteerinkia ette tärvätä itteä jollaki laila. Jos sie olet alle 25 vuotias sie saatat kans ottaa yhtheyttä nuorisovasthaanoton kans, ja jos sie kuljet koulua sie saatat saaja apua koulusaihraanhoitajalta eli koulukyrattorilta. Jos sie olet epävarma mihinkä sie käänyt sie saatat soittaa 1177 niin net auttavat sinua oikehaan tukheen eli hoithoon. Sie saatat valikoittea ette puhua ruottia eli englantinkieltä. Vississä rekiuunissa sie saatat saaja telefoonineuvoja muila kielilä. Sulla saattaa olla oikeus tulkhiin ko sie käyt hoijossa. Taho joku johonka sie luotat ette auttaa sinua jos se tuntuu vaikealta ette itte ottaa yhtheyttä hoijon kans.