Kuinka tueta sitä joka voipi huonosti

Mitäs sie saatat tehhä ette auttaa toisia voihmaan paremin? Sie et tartte olla psyykkisen terhveyen ekspertti ette saattaa tueta sitä joka voipi huonosti.

Joskus sitä tarttee apua eli tukea likheiseltä ette voija paremin. Sie saatat tueta sinun perettä, sinun kaveria, työkaveria eli muita joita sie tunnet erilä laila. Tärkeä on ette sie näytät ette olet sielä henkilölle joka tarttee sen, puhut ja kuuntelet ilman ette tuomittea, ja piiain sie huolehtit ette tet keksittä tehhä jotaki hauskaa yhessä. Esimerkiks puhua kaikenlaista, ei aivan kunka henkilö jaksaa. Se on hyvä tapa näyttää huolelisuutta ja helpottaa puhua vaikeimista asioista. Sie et tartte olla psyykkisen terhveyen ekspertti ette tueta sitä joka sen tarttee.

Tipsiä kunka tueta sitä joka voipi huonosti

Ei se aina näy jos joku voipi huonosti. Kysy mielelhään kunka joku jaksaa
jos sie eppäilet. Se saattaa tuntua vaikealta ette tueta sitä joka voipi huonosti. Mutta tärkein on näytät ette sie välität, esimerkiks kuuntelemalla ja tarjoamalla apua.

Jos sie puhut henkilön kans joka voipi huonosti:

Uskalla kysyä kunka henkilö jaksaa. Päätä mielelhään aika ja paikka jossa tet saatatta puhua rauhassa. Joskus se saattaa olla helpompi puhua jos sitä samala tekkee jotaki muuta, esimerkiksi käypi kävelemässä eli fiikkaamassa.
Kunnioita jos henkilö ei halua praatia. Se keltä sie kysyt saattaa tykätä ette tuntuu liian privaatilta puhua huonosta voinista eli se hävettää mitä hän tuntee. Älä ole pettyny jos henkilö ei halua puhua hänen voinista, tärkeintä on ette näytät ette sie välität.
Sano ette sie olet sielä jos henkilö muuttaa mieltä.
Kuuntele avoimesti ja tuomittematta. Näytä ette kuuntelet: nyökkää päätä, hmmaa äänheen, ja katto silhmiin. Kysy jos sie et käsitä. Vältä ettet varsin antaa neuvoja eli ette kerrot omista kokemuksista. Sie saatat vahvistaa vaikeita tuntheita sanomalla ette kuulustaa siltä ette henkilö mennee läpi jotaki raskasta. Kysy onko mithään mikä saattas parantaa tilanetta. Sillä laila sie näytät ette haluat hoitaa tilanetta yhessä
ja löytää tietä etheen päin. Jos on kova ja yrittää saa huonovointisen
henkilön ”heittää houraamasta” eli käsittelheen ongelmaa
saattaa lisätä stressiä, häpeää ja syylisyyttä. Useasti riittää ette
vain olla siinä ja kuuntella.
Anna toivetta. Sano ette sie uskot ette paranee vaikka ymmärät
ette on vaikea justhiins nyt. Kerro ette tet koetta yhessä ja ette
on tavalista voija huonosti eikä nähhä valoa justhiins tällä hetkelä. Mutta aijan olhoon tilane parantuu. Sie saatat kans sanoa ette otat esile informasjuunia mitä tukea on olemassa henkilöle. Tämä on erityisen tärkeä jos se mitä henkilö kertoo herättää kiusaa sinussa.
Jos henkilö voipi kauhean huonosti, rohkaise hakheen ammattilaisen apua. Sie et itte saata olla henkilön psykolooki, mutta olla läheinen. Sie saatat esittää ette auttaa varraahmaan aijan eli olla matkassa hoithoon. Ole selvä siittä ette olet mukana koko aijan niin kauon ette henkilö saapi apua. Ja ette haluat olla henkilön elämässä jälkhiinki. Jos uskot ette olis hyvä jos useampi henkilön läheisyyvessä sais tietää kunka hän jaksaa, sie voit kysyä jos on ok ette puhuttelet muita ketä hän luottaa.

Kysy jos tet keksittä jotaki mitä henkilö haluaa tehhä. Useasti sitä voipi paremin ko saapi tehhä jotaki mistä tykkää. Se on piiain ette jua kahvia, mennä kävelemhään, kattoa filmiä, pelata jalkapalloa eli jotaki muuta. Se saattaa kans olla hyvä tipsata uusista aktiviteetistä jota sitä saattaa pruuata yhessä. Koska uuet intressit voivat johtaa uushiin yhteykshiin ja innostukshiin. Kun met voima huonosti useimat saavat tuen rytiinistä ja arkipäivän yhtheyksistä. Sen takia saatat kans kysyä jos tet esimerkiks träänaisitta yhessä, lukisitta eli jotaki muuta. Kuuntele mitä henkilö jaksaa tehhä justhiins nyt, ette siittä ei tule liian raskasta.
Ole kärsivälinen. Näytä ette olet sielä jos henkilö haluaa puhua eli tehhä jotaki. Ole yhtheyvessä, vaikka henkilö ei ole yhtä sosiaalinen ko tavalisesti.

Tueta hakemhaan ammattilaisen apua

Jos uskot ette henkilö tarttee enämpi tukea ja apua sie saatat mielelhään auttaa ette henkilö löytää oikehaan paikhaan.

Avun hakeminen saattaa olla raskasta sille joka voipi huonosti. Se saattaa olla vaikeata tietää mitä sitä sannoo hoijole, ja raskasta sanoa niinku asiat on. Hoijon työmalli on useasti ette ensiks arvella ennen ko henkilö lähätethään kauemaks. Eli tarjota aijan vähän jälemin, riippuen kunka hätäiseks tilanetta arvioithaan. Mikä piiain ei vastaa henkilön tarvetta ette suohraan saa puhua tuntheista. Henkilö saattaa kokea ette häntä lykäthään pois ja lähätethään eestakashiin. Sen takia on tärkeä ette sie joka olet tukena tahot hoijon olla selvänä mitä tulthaan tekemhään – kuka eli kenheen ottaa yhtheyttä, ja koska ja kunka sitä tehhään.